《街頭祖霸王》籃球明星基利艾榮、奧尼爾挑機!跨世代夢幻組合玩轉街場

《街頭祖霸王》講述街波領隊丁屎(路威賀維 飾)傾盡畢生積蓄,為球隊報名參加喺街頭籃球聖地──洛克公園舉行嘅大賽,點知成隊波畀宿敵撬走,獎金夢碎,連條女都被撬埋。絕望之際,丁屎竟然遇到傳說中嘅隱世街場巨星祖伯Uncle Drew (基利艾榮 飾),仲氹掂佢出山再次披甲。祖伯為咗證明「鋒利過嘅刀,都有再鋒利嘅一日」,特別要求搵返當年嘅隊友(奧尼爾、米拿、韋伯、羅賓遜、萊斯莉 飾)拍住上,勢要畀而家班後生睇吓…波,始終係老嘅辣!

※熱爆17億眼球!!瘋魔全球短片躍登大銀幕※

打街場最過癮之處,莫過於跟隊同三唔識七嘅人鬥波,有時仲會遇到隱世高人過番幾招添!香港街場曾經一度係Fisherman Lok同比比鳥呢對籃球孖寶嘅天下,可惜兩位神人已經轉行拍戲,一眾巴打無緣同兩位鬥波,絲打亦再睇唔到佢哋射籃嘅英姿。眼見兩位灌籃高手喺娛圈撈到風生水起,稱霸美國街場嘅Uncle Drew實行有樣學樣,仲搵埋多位NBA名人堂巨星傍住齊齊殺入大銀幕!

※跨世代夢幻組合玩轉街場 NBA巨星喜劇細胞勁爆發※

Uncle Drew係百事可樂短片中嘅虛構角色,咪睇佢成頭白髮兼凸腩,呢位阿伯後生時其實係街場巨星,基本功紮實,得分、過人技術自然比後生仔更多花臣。

由NBA勁旅塞爾特人巨星控衛基利艾榮(Kyrie Irving)化老妝扮演嘅Uncle Drew,每次出場例必俾人笑屎波,但熱完身就即刻嚟料,crossover、急停跳射、超遠三分、剷籃、偷波、入樽樣樣齊,令全場後生仔大跌眼鏡。百事2012年推出第一集網上短片已經瘋魔全球,系列單計Youtube嘅總點撃率至今已經破億,而喺各大社交平台嘅總瀏覽量更超過17.5億﹗難怪會吸引《移動迷宮》(Maze Runner)系列監製馬提保雲(Marty Bowen)將系列搬上大銀幕。

充滿喜劇細胞嘅艾榮今次會繼續親身上陣施展球技,仲搵埋多位NBA殿堂級人物組隊落場,包括4屆NBA總冠軍「巨無霸」奧尼爾(Shaquille O’Neal)、三分神射手「牙擦蘇」米拿(Reggie Miller)、帝王傳奇前鋒韋伯(Chris Webber)、三屆入樽王尼特羅賓遜(Nate Robinson)及4屆奧運女籃金牌得主萊斯莉(Lisa Leslie),再加上剛剛憑《訪‧嚇》(Get Out)勇奪MTV電影大獎「最佳喜劇演出」的路威賀維(Lil Rel Howery),帶住呢隊明星隊,肯定會傾盡全力大放笑彈!

※唔玩唔知身體好 老友個個球技高※

街波領隊丁屎(路威賀維 飾)傾盡畢生積蓄,為球隊報名參加喺街頭籃球聖地──洛克公園舉行嘅大賽,點知成隊波畀宿敵撬走,獎金夢碎,連條女都被撬埋。絕望之際,丁屎竟然遇到傳說中嘅隱世街場巨星祖伯Uncle Drew (基利艾榮 飾),仲氹掂佢出山再次披甲。祖伯為咗證明「鋒利過嘅刀,都有再鋒利嘅一日」,特別要求搵返當年嘅隊友(奧尼爾、米拿、韋伯、羅賓遜、萊斯莉 飾)拍住上,勢要畀而家班後生睇吓…波,始終係老嘅辣!

 

Facebook專頁 : 給我一個看電影的理由  ( https://www.facebook.com/reasonformovie )

Leave a Reply

Your email address will not be published.